話說小朋友的提問「字字玻璃」，經常使大人尷尬 (因為佢唔尷尬)。

已移民的小朋友問「我哋係咪唔會再返香港呀」、「點解我哋要來呢度生活嘅」，問得大人口啞啞。

小朋友有極強的直覺。如果答「Daddy Mummy 想你生活自由啲」，可能會換來「咁我有無自由返香港呀」之類的挑戰，提醒父母「你咪都係咁獨裁」。

事實上，移民很大部分動機是唔想愛國愛檔。只是移民唔包掂，如果最終被迫回流與及被迫愛國，將會是對心靈莫大的傷害。

所以無論移民與否，對於「檔國」問題總要有自己的一套理解、一個說法，以過得自己過得人 (小朋友)。

希望以下的示範解答，可以啟發你找到自己的答案。

【👧🏻問題1⃣️：點解要有國家？】因為地球很危險，國家可以團結人民打人，被打的時候也可以集體求救，增強關注。

【👧🏻問題2⃣️：點解要愛國？】因為唯有愛才能使人安定下來，積存財富、建立家庭、尋求幸福，除非這些都不想要。

【👧🏻問題3⃣️：點解愛國要愛埋檔？】愛丈夫送奶奶、愛上帝送教會、好同事送壞老闆。事情都有無可逆轉的源頭，而源頭是歷史，無法改變。

【👧🏻問題4⃣️：愛唔落咁點？】婚禮上經常會聽到「愛是恆久忍耐」這句話。除了源頭 (奶奶) 不一定可愛，對象本身都有不可愛的特質，所以愛才需要「忍耐」。

做日本人要懂裝假，在香港要識愛國，不是因為裝假很舒服或祖國很開明，而是因為這樣做對方才感受到愛，關係才能持久。有偈傾，總比針鋒相對好。

【👧🏻問題5⃣️：咁點答小朋友好？】愛是幸福的前提，愛都有代價。移民只是放低某些不愛的，換上另一些不愛的：

「Daddy Mummy 想試下第二種辛苦，所以來呢度生活。」

「如果太辛苦我哋返香港。」

愛，是恆久忍耐。我愛香港，希望人人精神健康，同時也要愛香港人好直觀、好實際、唔睇字、唔抽離，日日否定我的存在意義，天天傷害我的弱小心靈！

說到底，每個人的生命中都有不喜歡的「國」、不認同的「檔」和異文化的「奶奶」。與其到處尋覓【值得愛的愛】，不如愛不可愛的，實踐真愛。